朋友推介之下，決定約埋一齊去路邊煱試吓，估唔到竟然在放工嘅時候掛紅雨，因為一早約好的關係，我哋決定就算紅雨照去試吓。
雖然呢個地方，我唔太好熟悉，不過經過路邊煱嘅侍應指引之下都好容易搵到。這裡湯底比出面的餐廳特別, 如花彫醉雞煱, 水煮魚煱, 招牌什菌花甲蟹煱等等, 另食物的選擇亦唔少.
在火煱前, 我哋叫咗兩個小食，陳醋野山雲耳及椒鹽魷魚鬚, 陳醋野山雲耳，清新開胃， 而椒鹽魷魚，相信係即叫即整，外脆內軟，香口惹味。
食完小食，我哋叫咗今晚嘅主角招牌什菌花甲蟹煱，在湯底來之前，侍應好細心送上不同的配料，有我至愛嘅蒜頭，每次打邊爐我都會食好多蒜頭，而呢度嘅配料係任你隨意落嘅，並無限制。
除咗花甲煱，我哋亦叫了手切本地肥牛及安格斯肥牛， 三寶餃，手打四寶丸，粉腸，同埋我至愛嘅響鈴。
登登登, 主角出場啦，湯底好鮮甜，吸收所有嘅精華非常入味，在打邊爐前，我哋每人飲咗兩碗湯，好多蟹膏呀，食得出蟹及花甲都好新鮮，而且湯底裏面仲有不同什菌，非常足料，真係值得推介。
而手切本地肥牛同埋安格斯肥牛， 我比較喜歡本地手切肥牛，因牛肉肥瘦適中，而朋友較喜歡安格斯肥牛，不過嚟到嘅話兩個都值得一試。
三寶餃裏面嘅沙葛餃，比較特別，我第一次食，雖然配搭新穎，但味道好夾，而手打嘅四寶丸，都相當出色，我特別喜歡豬肉丸及墨魚丸，因鮮甜彈牙。
而粉腸比我想像中好味，至於我最愛嘅響鈴，原來這餐廳是即叫即炸的，好味過係街買嘅好多。
結帳及離開前，還有雪糕糯米糍送贈。 總括嚟講我對這一餐相當滿意，因為食完之後完全冇口渴嘅感覺，一食就知道佢哋係冇加味精，下次有機會一定會帶屋企人來試下。
